分享：
宏福苑大火聽證會周五（20 日）進行第二日聆訊，有不少居民抵中環展城館旁聽。獨委會一方周五完成開案陳詞。有居民離場後落淚稱，會上提及的情況，居民一早已經感覺到，「但冇人會應你㗎，冇人會同你攞返個公道嘅」，又指「宏福苑只係話畀你知，香港係有問題」。
相關報道：
獨委會：宏業堅持用發泡膠板封窗 後樓梯「生口」違規
獨委會：宏業董事與5入標公司有關連 鴻毅疑篡改回標報告
居民張小姐落淚指感辛苦、難過
居於宏昌閣的張小姐離場受訪時落淚，「我屋企俾人燒咗，呢幾個月嘅苦難，點解會咁樣？我哋都好辛苦、難過，但我哋乜都做唔到，可以點，我都希望政府畀返個交代我哋」。
張小姐指，兩日會上提及的情況，居民一早已經感覺到，「但冇人會應你㗎，冇人會同你攞返個公道嘅，個個只係話唔關我事」。
她指，「我哋宏福苑呢單，只不過係今日香港所發生嘅其中一件事，再咁樣落去，仲有其他嘅事情，一路會發生⋯⋯宏福苑只係話畀你知，香港係有問題」。張小姐又指，「如果有人肯做啲嘢，或者唔係咁多錯誤一齊發生，就唔會有今日」。她指政府需要執法，「唔執法，淨係捉我哋過馬路有咩用呢？」
居民鄧生：若維持現行制度
難以杜絕圍標
聽證會點名多個政府部門，指互相推卸責任。同樣居住在宏昌閣的鄧先生，聽畢表示「相當無助」，指是制度問題令到業主或不同背景的居民，需要組成業主立案法團以跟進工程，但他們都缺乏專業知識去理解價錢、物料等細節。
就會上提及，大維修的工程顧問公司鴻毅涉更改紀錄，鄧先生指非常意外、非常震撼，又指若維持現行制度，居民難以杜絕圍標問題。他稱：「圍標呢樣嘢，好似喺香港建築界已經係慣例咁樣，只係你有冇能力去揭露出嚟，揭露出嚟有冇人關注呢」，對此感無力。
被問到第 12 屆管委會主席徐滿柑陳詞指，法團沒有專業知識，處理大規模的工程，鄧先生同意「正常都唔會有（專業知識）」，又指參考香港不同案例，都是推翻了法團、天價維修工程，然後再重新招標，所以都不是單一個案。
鄧續指，坊間有不同建議，日後有大維修工程時，政府可介入更多，由政府幫助居民選擇哪個承建商、採用甚麼方案，再讓市民去選擇，「可能會好啲」。
居民何生：徐滿柑沒把握機會陳詞
第二日旁聽、住在宏仁閣的何先生則認為，徐滿柑沒有把握機會陳詞，指他浪費時間，「你上得去代表，要講嘢，唔係聽你喊，唔係聽你講咩獨委會啲陳詞好正呀，冇乜意思」。何又認為「（徐滿柑）最少幫自己講嘢，澄清自己有冇受貪污，自己做嘅嘢係咪正直、正確。」
被問及以往有否參與屋苑會議，何先生指法團不少會議在平日召開，「個個返工，有幾多個可以參與吖？」
在是日聽證會上，委員會首席大律師杜淦堃指，對話訊息顯示徐滿柑知悉封窗的發泡膠板非阻燃，並曾向宏業董事何建業發訊指，可否找到「冇咁易燃」的發泡膠板，又提醒拍片時「唔好咁流」。何回覆如訂到可以轉換，但「第一期無法更換。」
徐滿柑中午在場外見記者，指法團上任後即提出質疑，詢問宏業能否證明發泡膠封窗屬業界正確做法，但對方回覆沒有法例規管封窗物料，「所以我哋無辦法話強迫佢話你犯法喎，要換喎，咁唔得呀嘛，因為佢話冇呢個條例去規管，所以我哋都無辦法」，只能要求宏業日後再購買發泡膠板時，改用阻燃性較高的物料。（見另稿）
没有评论:
发表评论
注意：只有此博客的成员才能发布评论。