分享：
逾 5 年前發生的元朗 7.21 襲擊事件，林卓廷等 7 名「非白衣人」經審訊後，被裁定在元朗站參與暴動罪成，還押至周四（27 日）在區院判刑。司法機構派出逾百張旁聽籌，來者包括民主黨成員、林的前同事、街坊，亦有與林不相識的新界東選民。
前議助說，林用心做地區工作，常叮囑「做好每一個 Case ，唔好錯過任何一個幫到街坊嘅機會」。有新界東選民指，昔日在區議會、立法會直選都投票支持林，讚他反圍標對抗黑社會是勇敢，亦做出成續，幫助到小業主。
有人談論林的陳情信，說有同感、受觸動，顯出中大新亞書院的精神，又指林「嚟緊佢又有一段好漫長嘅時間仲會喺入面」，想像他或會擔心在外的家人。
攝：YM、Krystal Hong
公眾籌派逾百張 有人凌晨 3 時到場
周四早上氣溫最低見 16 度，排隊旁聽的人大多身穿厚衣，亦有人手捧熱水壺，部分人把風衣笠頭蓆地補眠。
排頭位的人說凌晨 3 時許已到場，當時天仍未光，四周無人，不少人特意為旁聽本案請假。截至早上 10 時 30 分，即開庭前半小時，司法機構已派出 100 多張公眾籌。
前議助憶林囑做好每個個案
選民讚反圍標「好勇敢」
來旁聽的人，不少都說想見林卓廷，當中有他的前議助，亦有曾投票予他的選民。
林的前立法會議員助理姚小姐說，與林卓廷已共事 10 多年，由林做民主黨總幹事，到 2016 年當選立法會議員，都一直在旁，「其實好長，十幾年，唔係剩係單單 5 年任期」。
她說，林卓廷「成日都會提醒我哋做好每一個 Case ，唔好錯過任何一個幫到街坊嘅機會」，亦會叮囑他們「要用心做好每一個個案、要覆啲街坊」，直言「所以我覺得佢喺做地區上面，其實係好用心」。而今天她為見林，早上 8 時許便到場排隊。
以前住上水的新東選民鄭先生指，今早乘頭班車到場，連早餐也沒吃。他稱在區議會、立法會皆投票予林，「我投佢做雙料議員，所以有感情嘅！結果佢兩個議席都贏咗，佢大比數贏建制派」，頓一頓後，他補充稱當時「佢第一次參選」，說著手指更舉起一字。
問起他如何評價林卓廷任議員時的表現，他說「我覺得佢就好勇敢嘅」，指林早於參選之前、約在 2014 年，已成立與反圍標相關的聯盟，「其實好多圍標嗰啲暗黑力量，都係同黑社會有關，（佢）嗰陣時高調 form 呢啲咁嘅打擊呢啲咁嘅圍標呢，其實係好危險嘅」，而他認為林「好有成績」，「令到啲私人屋苑小業主呢，都唔使受嗰啲業主委員會呀…拉攏…佢做到嘢嘅」，其後又評價林卓廷處理水貨的表現，「呢兩方面真係做得好出色，做到嘢嘅」。
同樣是新東選民的蔣先生則說，對林卓廷的印象是「好親力親為」，會見到他擺街站，解說政綱、為市民做了甚麼等。
多人稱受林卓廷陳情信感動
林的 Facebook 專頁，早前發布林呈交法庭的陳情信（見求情信全文報道），有旁聽人亦談論。蔣生說，最記得對林提及父親的一段。林在該段提及，父親不良於行仍往赤柱探他，他感恩無限。
蔣說，「嚟緊佢又有一段好漫長嘅時間仲會喺入面」，又稱自己也曾因示威案服刑，想像林最擔心是家人在外「會唔會有病有痛呀，萬一有咩唔舒服，有無人帶佢哋去睇醫生呀」。他說，「即係我相信，呀林卓廷佢嗰個感覺，都應該同我當年個感覺一模一樣」。
同為民主黨成員、前支聯會常委鄧岳君則說，林卓廷是中大新亞書院的學生，信中能見到他的「儒家精神」和「新亞精神」，既有引用錢穆，亦有「艱險我奮進，困乏我多情」之意。
鄭生則說，林的信「好 touching，好觸動人心」，「如果唔係因為佢深陷而家嘅境況，我哋唔係好了解佢嘅內心世界。雖然佢係公眾人物已經十幾年，但係一喺一個咁嘅處境下，佢透露自己嘅內心呢，我哋先會係，了解佢更多。覺得呢個人，係好值得支持嘅」。
多人稱未忘 721 畫面
多名旁聽人士皆稱，仍然記得 721 事發時的片段與畫面。曾旁聽 47 人初選案的 Zoe 說，「呢單案太重要喇，對於好多香港人嚟講，係唔會忘記」，又說「好多人嗰晚都瞓唔著，大家無忘記件事…當日直播嘅時候太恐怖喇啲場面」。
Zoe 稱，她認為當天被告所做之事，「唔係一般人都敢做嘅事，因為佢哋係保護緊一啲被傷害啦，或者驚恐裡面嘅市民。唔係剩係自衛，係保護緊其他人」。
另一旁聽人士 Venus 憶起直播畫面，形容「好恐怖」、「好震撼」。她說「嗰時主要睇何桂藍，俾人扑先，你知女仔嚟㗎嘛…俾人咁樣」、「阿廷就眼鏡都跌埋」、「好恐怖囉！…有個衝入個，直情喺個月台度，衝入個車度」、「打咗疑似大肚婆張相，嗰個真係好震撼…佢用嗰條嘢咁發，自己會諗如果係自己點擋呢？」
李盈姿則說，最記得「衝入去打人，同埋下面叫囂、衝爛鐵閘，仲有就係警察攬住白衣人拍膊頭，個個㩉揸住晒棍話佢哋無攻擊性武器」。
她又說，當時看直播覺得無法無天，「啲警察去晒邊呀？應該係警察做嘅，結果係我哋市民要自己保護自己。後來揭露，其實警察喺度，一早就係地鐵控制室到」。
法官駁回自衛、保護他人等辯解
區院法官陳廣池於本案裁決時指，絕對相信首先有閘外白衣人的非法集結繼而暴動，「而閘內人群開首是有所被動但亦作出集體動作，互相對峙，繼而有些人按捺不住作出破壞社會安寧行為。2 個颱風在元朗站形成而互相激化。」
佢又指，事件可簡單分為「上集」與「下集」，本案是「上集」，是在大堂發生。他引用現場片段、被告供詞，駁回擲物、射水等是出於自衛、保護他人等等辯解，裁定 7 人與閘內人群一同行動，有意圖參與暴動。（裁決另見稿）
其他被告親友到場旁聽
同場亦有專程旁聽其他被告的人。有 3 名不願透露是哪位親友的旁聽，說他們認識的被告是好人。第七被告楊朗的朋友 Naomi、Ming 說，與楊在 2019 年前後相識。其中 Ming 說，楊重友情，待人友善，性格爽朗，很願幫人。其中 Ming 說，「有時有咩事都照顧住我，有時有啲咩問題都幫我解決」。
Ming 又說，楊之前透露過，希望有人支持他，故來旁聽。二人到達時，因人數太多，只能取延伸庭的公眾籌，但他們說「就算我哋未必入到，都唔係太過咩。我哋入唔到，代表好多人支持佢哋」。
DCCC1106/2020
文章来源：法庭线
没有评论:
发表评论
注意：只有此博客的成员才能发布评论。