分享：
《立場新聞》被控「串謀發布煽動刊物」罪一案周四（26 日）在區域法院判刑。排首位的旁聽者於清晨 6 時抵達，至早上 9 時已有約 30 名巿民排隊。有《立場》多年讀者首次旁聽，形容《立場》「陪住我成長好多」，感謝兩位前總編輯一直堅守自己的價值觀。記協前主席岑倚蘭指結果即使令人失望，但盼「風雨總有消除嘅一日」。
旁聽者之中不乏《立場》的前員工，有人形容兩名前總編「真真正正咁示範咗何謂風骨」；亦有前員工感激二人在《立場》最後的日子擔起風雨，令員工「每一日都好自由，做想做嘅新聞」。
前員工又言，案件代表《立場》正式走進歷史，「唔知今日之後，仲會唔會有人講《立場》？」
逾百巿民、領事代表等旁聽
大批傳媒採訪
案件原訂於下午 2 時半開庭，大批巿民、《立場》前員工及博客、記協前主席陳朗昇和岑倚蘭、前立法會議員陳家洛、及英、美、加、法等國領事代表提早在區院地下排隊，輪候正庭及 3 個延伸庭共 224 個座位，最終填滿正庭及兩個延伸庭座位。
各大本地及外地傳媒的記者，則於早上 8 時前，開始輪候 65 個記者席座位，大批傳媒亦在法院內外派員採訪。
旁聽巿民：到場代表支持背後理念
排首位的旁聽常客「姨婆」清晨 6 時已到場，她形容《立場》「好中肯去講大眾嘅心聲，你（當局）唔鍾意，咁冇辦法囉」，又說始終不明白兩位前總編輯為何被起訴、定罪。 「姨婆」稱對判刑沒有期望，只希望兩名被告身體健康，知道仍有許多人支持他們，「雖然睇落係好冇希望，都唔係嘅，人人都有嘅，唔會冇希望嘅」。
另一名旁聽者形容，「今日嚟就係我哋可以為佢做嘅事，特別希望 Patrick（林紹桐）平安」，今天提早近 7 時半到場，希望更多人進入正庭，表達對兩位被告的支持，「因為用唔到第二種方法表達。到場就係對佢哋背後嘅理念、新聞價值嘅支持」。
讀者感激《立場》堅守價值、陪伴成長
9 時許抵達的 W 小姐今天首次來旁聽立場案，她憶述由初中時閱讀《立場》的前身《主場新聞》，一直鍾愛《立場》的報道，「陪住我成長好多，佢（《立場》）由執嗰下我已經好唔開心」，稱早前看到裁決新聞哭了整晚，今天前來旁聽，「雖然好似咩都幫唔到，但好似可以見證吓…踏踏實實咁樣見證住佢」。
今天首次來到旁聽，W 看到有不少人排隊，深感「大家都冇遺忘之前發生嘅事，冇逃避到，覺得有種同個社會聯繫到嘅感覺」。作為多年的讀者，W 希望感謝《立場》「作為傳媒一直演好佢哋嘅角色…直到而家都仲係，好守衛到自己覺得正確嘅價值觀，令我覺得好值得敬仰」，亦希望兩位被告平安。
鍾沛權太太囚友：欣賞鍾堅持、正直
曾因社運案服刑、二十年前曾從事媒體工作的陳小姐，在懲教院所時常看到鍾沛權探望太太陳沛敏，亦曾與鍾交談，欣賞鍾一直「好堅持、好正直、好淡定」，又言自己也經歷過受審和判刑，深明「就算識或者唔識嘅人講句嘢，都係好大嘅力量」，希望到場與鍾打個招呼。
陳上次裁決日在延伸庭旁聽，她憶述聆聽陳情時不住流淚，有感新聞自由、巿民的知情權受限制，「報道真正新聞嘅媒體都俾佢封咗，咁巿民可以喺邊度得知一啲真實嘅嘢呢？」希望兩位被告繼續堅持。
記協前主席岑倚蘭：盼風雨總會消停
曾與鍾沛權共事、相識近 30 年的記協前主席岑倚蘭亦在 9 時到場，希望進入正庭支持兩位「行家」及他們的家人，今早亦發訊息給鍾沛權和林紹桐，「風雨同路繼續撐你哋，願你們平安。」
兩名被告由被捕至今已逾兩年半，一直旁聽本案的岑，形容審訊「係好磨人嘅一個過程」，不認同裁決理由，亦感到憤怒，「做新聞之嘛，做到點解都要坐監？」但希望即使結果「可能好令我哋失望，但係都心存盼望，風雨總有消除嘅一日」，她亦會繼續支持同行，「讓佢哋唔好覺得孤單」。
林紹桐大學同學稱林有理想
自大學時期與林紹桐相識十多年的 Andrew（化名）則形容，「我認識嘅 Patrick 係細心，同埋佢係有理想，佢都明白呢份工唔會發到達，但會覺得做緊嘅嘢好有意義，我會好欣賞佢咁諗」。
Andrew 在 2021 年曾旁聽案件提堂，其後移居外地，最近回港知悉案件將判刑，希望前來旁聽，「有頭有尾」，期望判刑結果，令林「唔使點坐（服刑）就 OK 啦，只可以咁樣希望」。
Andrew 又指《立場》對他而言「係其中一個角度睇社會事件，好似真係失去咗一樣好重要嘅嘢…但我好 appreciate （欣賞）係，佢哋呢段時間做過嘅嘢」。
前員工：案件見證傳媒業相對自由時代終結
除了相識的朋友、同行，旁聽者中亦不乏《立場》的前員工。曾任職《立場》記者的 Christina （化名）早上前來輪候旁聽席，希望進入正庭支持兩位她「相當敬重」的前上司。她指在新聞界常言風骨，「但係究竟咩係風骨呢？我覺得佢哋兩個，係真真正正咁示範咗何謂風骨」，希望進入正庭讓他們看到熟悉的面孔，「減輕少少嘅不安」。
案件由提堂至今逾兩年半，Christina 形容心情沉重又解脫，因為案件終結，除了象徵自己記者生涯的完結，同時「見證住傳媒一個仍然有相對自由嘅時代嘅完結，我都想用我嘅雙眼去望住呢件事」；同時兩位前上司因案件歷時已久「令到佢哋人生無辦法向前行」，因此結案亦是一種解脫，「希望佢哋保重身體，未來見」。
前員工感激上司承受風雨
曾在《立場》任職的阿逸（化名）亦來到區院，希望「叫做送別兩個老細」，他形容最傷心的時候已經過去，現在不會特別傷春悲秋。阿逸亦認為，案件的終結象徵要放下事件，「《立場》真係要放喺歷史入面，都唔知今日之後，仲會唔會有人講《立場》…希望有啦，唔知呢？」
阿逸憶述兩位前上司「係我見過最正直嘅人」，在《立場》結業前的一段時間，相信他們承受很大壓力，感激兩人仍堅持信念，承受風雨，讓員工「每一日都係好自由，做緊自己想做嘅新聞」。他又感慨兩人由被捕，以至到庭上陳情時，仍沒放棄信念，「只遺憾自己做得唔夠好，做唔到佢哋兩個咁樣，咁正直、咁信守新聞自由，冇堅持落去」。
阿逸亦希望向兩位前上司說：「你們一直在做正確的事，遲啲見，好快再見」，冀大家繼續「勇敢面對」。
前博客作者：見證香港歷史進程
前《立場》博客作者，Pazu「薯伯伯」指案件歷時甚久，無論被告是否需要再入獄，「都係一個了結」。他說相信鍾沛權和林紹桐現時心情平靜，自己作為朋友，只能珍惜共處的時間，「可能冇咩嘢可以做到，都係祝願佢哋一切安好」。
他亦認為，許多人分析本案判決如何影響言論自由空間，但其實案件的審訊過程，本身已經影響言論自由，作為一個香港人，在能力許可下「都想嚟到見證呢件歷史事件…純粹企喺度做一個見證，我覺得本身就係一個意義」。
《立場新聞》停運至今，「薯伯伯」形容香港少了言論自由、「百花齊放」的空間和氣氛，「好似《立場》就係一個時代」，見證《立場》由興起、結束到結案，「好似係睇住、見證住一個香港歷史嘅進程…佢係好定壞，大家心裏有數」。
前《立場》攝記：三年，都叫做終於結束
前《立場》攝影記者 Harry 約中午 12 時，趕在上班前來法庭「見吓佢（前上司）」。他說，之前都有與兩人見面，「都希望喺入庭之前見最後一面，要講都講晒，可以講都係等佢出返嚟」。
Harry 又表示，今天心情沉重，「又好似叫終於結束咁，都三年，對於佢兩個嚟講，對於大家嚟講，都叫終於結束」。
DCCC265/2022
文章来源：法庭线
没有评论:
发表评论
注意：只有此博客的成员才能发布评论。