分享：
某個清晨，阿輝和阿欣如常餵兩個多月大的兒子喝奶、掃風，再抱到床上哄睡。不同的是，兩人換了白恤衫。待他進入夢鄉，兩人悄悄撫摸小手、小腳丫，在他的臉上親吻一下，於他耳邊輕語：「Daddy Mami 走喇」。
看着眼前的 BB，阿欣和阿輝預想，他至兩歲半的每個成長階段：要接種疫苗、6 個月大以前要給他看黑白圖卡，刺激視覺發展；一歲多可看字卡，認識顏色、數字；兩歲多時申請入讀幼稚園，還有每年交保險⋯⋯兩人排好時間表、準備物資，好讓家人代為照顧。
他們涉理大衝突被捕，承認暴動罪。宣布刑期後，阿欣左算右計，驚喜暗忖：「嘩，嚟得切」——最緊張的幼稚園入學申請，她出獄後可以親自處理，丈夫遲她數星期出獄，估計能夠出席幼稚園面試。
「我哋都擔心，如果我哋唔夠時間，就由婆婆、姨媽去，咁當然都好尷尬，點解 Daddy Mami 唔喺度。」
兩年後，一家三口步出幼稚園，兒子拿着學校派發的氣球蹦蹦跳跳。夫婦倆說，兒子挺喜歡校園氣氛。他們帶兒子去麥當勞，看他小口吃着一根根薯條，嘴巴沾上番茄醬，便用紙巾為他拭擦，滿眼是愛。
阿輝和阿欣慶幸能陪伴兒子第一次面試，回想兩年在囚光陰，未能見證兒子的第一次翻身、第一次行路、第一次喊爸媽，兩人卻不抱憾。
阿輝說：「我哋唔係第一下，唔係喺嗰個 moment 見證，但唔緊要，起碼我哋都知道，可以見證住呢個 progress。」
「我當我有 90 歲好未，我都同佢過到 88 年吖。」阿欣說。
編按：受訪者均為化名
共患難
數年前，情侶阿欣、阿輝因理大事件被捕，被起訴暴動罪。當時兩人是大學生，手頭上還有一大堆 Presentation、Quiz 和 FYP，擔心案件耽誤學業，幸得學校諒解、同學幫忙，追趕功課進度，順利畢業和找到工作。
兩人的人生軌跡，看起來與一般社會新鮮人無異，但生活上處處是限制，例如須往警署報到、遵守宵禁、不能出境。兩人原本打算不認罪「搏一搏」，想在開審前努力賺錢，留給家人最大保障。
阿欣本身有一份正職、加上兼職、Freelance，總共返 4 份工，卻一點不覺得辛苦，「冇時間畀我浪費，我之後如果坐 3 年，我依家再 hea 兩年，我 5 年咁樣 hea 咗佢呀？唔得。」
經歷被起訴、甚至有機會一起入獄，兩人欲步入人生另一階段。「嗰時好想同佢求婚」、「我好想嫁畀佢」，兩人異口同聲地說。
兩人當時拍了一年多拖，阿輝說：「咁特別嘅一個關係，咁特別嘅一個經歷，咁仲可以搵到邊個有呢樣嘢？就算拍得唔算長，但已經太刻骨銘心，好想去挽留呢個人。」
兩人想好同年找機會求婚，可是阿輝遲遲未行動，阿欣不害羞，常常追問阿輝進度，「你求婚未呀，你唔求我求㗎啦」。
阿輝說，當時已計劃一切，向她說「唔可以，留畀我（求婚）」。阿欣沒他好氣，翻一翻白眼，說當時是 12 月，「大佬得返 30 日揀，你仲唔求？」
阿輝最後在一個聖誕派對，趁朋友、家人在場時，突然向阿欣求婚。阿欣感動得「由頭喊到落尾」，望望身旁友人，竟比她哭得更誇張，「佢哋話『搞錯，唔講』，好似佢哋俾人求婚咁⋯⋯」，令她哭笑不得。
珍貴的禮物
阿輝和阿欣喜歡小朋友，生孩子一直是兩人目標，原打算在案件完結後才備孕。但一次身體檢查結果打亂了計劃——阿欣被診斷有子宮腺肌瘤的前期徵狀，懷疑是母親遺傳。
「我媽咪生完 BB，可以切晒成個子宮」，可是阿欣仍想懷孕，「咁一定唔會考慮呢個 option。」
「我問醫生，我嚟緊可能坐監，要坐 3 年㗎喎，我 3 年後先生 BB，O 唔 OK 呢？醫生話，你粒瘤可以 3 年後都冇大，都可以 3 個月之後，粒瘤就好大，咁你要刮宮，刮宮係好難有 BB⋯⋯如果你依家 OK，不如你試吓生，你自己衡量。」
阿輝和阿欣有些掙扎，因一旦入獄，好像「老奉」留下孩子予家人照顧。
「就算我哋儲夠錢，咁屋企人 sup 唔 support 到都好重要」，阿輝說，「好似我哋少少自私，因為佢嘅健康原因，去選擇生小朋友。」
阿欣說：「如果冇佢哋 back up，我一開始就唔會生小朋友。問過晒佢哋，我有咁嘅決定，你哋支唔支持，冇人支持我，我唔會去做。」沒料到媽媽、家姐一口答應：「生啦，緊係生，又唔係冇人幫你湊⋯⋯咁多人，一定湊得到，點解唔生？」
在家人鼓勵下，兩人積極備孕。可是生 BB 這回事，不是說有就有。
阿欣計算，扣除懷孕時間，大約有 8 個月時間受孕，「總之我唔要喺我開審嘅時候生，我開審前一定要坐咗月」。
「如果我喺裡面生，我覺得冇意思，我阿媽、我老公，我最愛、我最親嘅人唔喺我身邊，我自己生唔到，真係冇呢個能力，仲冇得坐月。我一定唔會叫我個仔陪我坐監，我生完就要即刻送佢出去，見得佢一個鐘，我就唔會揀喺裡面生。」
為了在限期前懷孕，兩人用盡方法，像是挑好在早上還是晚上受孕、計算排卵期，「中藥嗰啲我哋都食，雞精、魚精咩都食、拜神，咩都有做」，但始終不見動靜。
「好似 deadline fighter，然後我哋又會焦慮，死喇，係咪我哋身體唔好，唔夠健康，所以好似好難中。」阿輝說。
簽紙註冊的那個月，受孕限期逼近，兩人打算放棄：「如果呢個月都唔得，我哋就停止喇，我哋就真係避孕，嗰個月我哋最 relax，我哋（覺得）算啦，冇就無所謂啦。」
上天還是眷顧小倆口，為他們送來一份禮物。
在一個早上，阿欣在廁所大叫，激動地跑出來，向睡眼惺忪的阿輝展示驗孕棒。
「中咗喇！兩條線喇！」
最強大的後盾
小生命的來臨，也讓兩人改變答辯意向。
「當時未有小朋友，如果有機會，都會想嘗試打」，加上看到罪成的人漸多，阿輝說：「不如早啲去處理好佢，盡快返去小朋友身邊。」
「我哋覺得，就算幾日都好，遲幾日（出獄）都好，真係唔值得，所以早得一日就一日，始終個時間最緊要。」
兒子一天一天長大，阿輝和阿欣感受到，距離入獄的日子越來越近，分開一刻也越來越近。
兩人珍惜與兒子一起的時光，「我哋可以陪多佢一秒就多一秒，痴多一秒多一秒」，又為家人整理未來接近 3 年的育兒資料、時間表。
「同屋企人講聲大概點樣，到時喺 schedule 度睇，同埋 account 嗰啲，自己 access 入去，唔使到時問我哋『你 password 幾多呀』。」阿輝說。
「錢安排好晒，我個仔嘅衫褲、疫苗、上咩班，全部都安排好晒，奶粉買咗半年（份量），然後尿片牌子全部 research 好晒，始終我哋兩公婆都唔喺度。」阿欣說。
阿欣懷孕時，已心儀數間幼稚園，也給家姐心理準備，申請入讀幼稚園的過程繁複。她想像，或由媽媽、家姐帶兒子面試，若老師問及父母在哪裡，「可能話 overseas 做嘢，唯有係呢啲答案。」
兩人準備充足，不僅為了兒子，也為了減輕家人壓力。
「我唔想我阿媽辛苦，佢係主要照顧，我唔係拍拍籮柚入去，咁係好撚自私、好仆街，受嗰個係我哋兩個啫，屋企人冇份㗎咩？佢嚟探你都要時間、精神、體力啦，我可以做到就做，入去咩都做唔到。」
兩人入獄後，兒子在婆婆、姨媽悉心照料下成長，從小就常常外出，養成開朗個性；年紀小小已去過日本、泰國旅行。
「我都同我阿媽講，雖然個仔爸爸媽媽都坐緊監，但佢感受到嘅愛，一定唔可以比人哋少。」
阿欣唯一給媽媽的「任務」，就是教兒子說自己的名字、認顏色、打招呼說 Hello 和 Good Morning，「呢啲唔係我出嚟一個禮拜、一個月就教到，呢啲日常生活，婆婆都教得好好。」
阿輝也感恩，「佢哋完全冇埋怨過，一句辛苦都冇講，冇話『湊你個仔好辛苦』。」
「因為我哋好清楚，我哋係互相撐住對方，如果我冧或者我呻，我阿媽都唔開心；我阿媽呻，我都會唔開心。我哋通常都係積極咁行過去，有問題咪傾囉，拎出嚟講。」阿欣補充。
監獄的「時差」
阿欣所在的懲教所設有親子中心，兒子可以定期探望媽媽、親身接觸。
兒子還小，不了解坐牢是怎樣一回事。婆婆告訴他「Daddy Mami 去咗返學」，「聽日去探 Mami，你乖乖地啦喎，會見到姑娘」，他似懂非懂說「哦」。
阿欣說，兒子長大後，她不會向他隱瞞這段過去，「嗰啲係經歷嚟，我冇得改。」
能與兒子相處，阿欣開心不已，兒子卻不太「領情」。「佢頭 9 個月都係喊，每次一入嚟搵我就喊，一開頭可以喊 9 個字。」
「可能一開始同你唔熟，我就婆婆抱住（兒子）、（兒子感到）好安全。」阿輝沒有親子探訪，兩年來只能隔着玻璃窗與兒子見面。
他最多是聆聽阿欣的「報告」，知道兒子長大了多少：「佢爬得好犀利」、「佢慢慢扶住啲嘢企起身」、「佢依家行得好穩」，「佢（妻子）真係可以見證個進程，我真係要透過相、屋企人講先知。」
阿輝不免感到有點酸溜溜，「有時候佢同我講，佢哋點樣互動，當然我都會好開心，但我未必感受到。」
為了多見兒子，阿輝幾乎將每月探訪名額都留給家人，朋友嚷着來探望，他都一一拒絕，「盡量想留返 quota 畀 BB，朋友 3 個月咁上下見一次。」
兒子從起床至抵達監獄，都要兩個多小時，有時到見面一刻，又差不多要睡覺。他心痛兒子舟車勞頓，「同我玩 5 分鐘已經好好，有時佢全程瞓，30 分鐘都冇點見到佢。」
「但我覺得喺嗰個 moment，我能夠可以細味、欣賞佢瞓覺，我都好滿足，反而多啲時間可以同屋企人傾偈，傾吓 BB 生活點呀。」
儘管隔着一扇窗，阿輝默默留意兒子的變化，看他從手抱至坐着；從表情豐富至學會說話。
「到再大一啲可以互動，傾偈問佢啲嘢，佢可能答到你。到我哋差唔多臨放學之前，佢可以行埋㖭，行嚟行去、跳跳紮，kind of 見證住佢嘅成長，只不過唔可以好貼身地咁望。」
兩人要面對的，還有監獄與外面的「時差」。
兒子一歲、兩歲的生日，阿輝和阿欣都不在他的身邊，好奇他有一個怎樣的生日會，每天都期待收到相片。「我哋收到佢生日會嘅信，可能係 7 至 8 日之後。」阿輝說，「我哋都好想親自見面，都冇辦法，唯有係見到佢哋開心，我哋都開心。」
「咁我 miss 咗佢兩年，我之後都仲有好多年，可以同佢一齊。」阿欣看得開，「最緊要係佢嘅感受，都係好開心，佢生日都係有好多人同佢慶祝，佢第一次講嘢、第一次行路，全部都有人為佢鼓掌，唔係佢自己一個行完坐返低，冇人理佢。」
延遲數天的快樂，還是會感到快樂，但延遲數天的擔憂，還未感受到，已經過去了。
兩人兒子曾因腸病毒入院，阿欣媽媽馬上透過福利官通知她，阿輝則見家人沒有如期探訪，猜測可能有事。「擔心都嚟唔切啦，因為已經 settle 咗，我淨係知佢曾經入過醫院，咁依家已經 OK、精神晒。」
還有一次，獄中懷疑有傳染病，阿欣擔心兒子同受感染，萌生不再親子探訪、身體接觸的念頭，「原來會有呢啲危險」。媽媽開解她說，始終是母子應該要多見面，「依家冇事就照見啦，度度都有菌㗎啦，你咁避，避得幾時？避得幾多次？」解開了阿欣的心結。
重拾關係
雖然阿輝、阿欣不在家，但家中還是充滿兩人身影——牆壁貼上他們的照片、兒子有印着兩人樣貌的公仔陪睡、家人也會播放他們的錄音，「仲有媽媽同我家姐，都係 keep 住同佢講，爸爸媽媽點樣，盡量喺能力上 connect 返。」
阿欣出獄後，兒子很快便黏着她，可能是天生的親密連結，獲釋的第一晚，已經可以陪兒子睡覺，她笑說是「無縫接軌」。
獄中作息定時，阿欣睡足 8、9 個小時，現在照顧兒子、做家務，真正休息已是凌晨，轉眼清早，兒子又鬧着起床，「冇諗過可以瞓咁少，依家得 4 至 5 個鐘瞓。」
還未適應媽媽的時間表，阿欣疲倦不堪，但很快打起精神，「嗰刻你會諗，我阿媽都係咁樣過呢兩年，咁就真係唔會怨。」
相隔數星期，阿輝也出獄，終於能夠回家與想念多時的兒子見面。他說，回家時兒子熟睡，「我咪自 high，摸吓佢。」阿輝說，抱兒子時感到他有些抗拒，「唔係佢唔認得，佢知道我係邊個，但唔夠親密，一個月見得 4 次，未係好 friend，我絕對尊重佢。」
經過一個月的相處，兩人熟稔不少，能讓阿輝牽手、擁抱甚至親親，「咪慢慢 friend 返，佢都喺我隔離，唔急。」
阿輝和阿欣未來數個月的行程緊密，補度蜜月兼拍婚紗照，打算明年開始上班。兩人把握這幾個月，帶兒子到處「放電」，遊覽大大小小的公園。
兩歲多的兒子精力充沛，一不留神跑遠，阿輝就在他身後看守，阿欣趁機稍稍休息。兒子學會了「Say No」，不願坐 BB 車，走上有他一半高的梯級，一下不穩跌在地上。阿輝沒上前安撫，拍拍手柔聲道：「唔緊要，企返起身」。兒子眨眨眼站起來，又是一輪奔跑。
「我阿媽都話，好彩我喺佢兩歲嗰陣出嚟，話兩歲之前，都仲可以湊到，仲可以抱住佢。依家兩歲開始，係你同佢鬥快，佢要駁嘴，又要開始同佢解釋好多事。」阿欣說。
快樂育兒經
這兩星期，阿輝、阿欣忙於陪伴兒子面試，為他挑選的幼稚園，都是 Happy School。
阿欣自言不是「虎媽」，「我同我老公都係普通小學、中學畢業，最後又讀到大學」。她與阿輝在乎兒子品行多於成績，「成績我可以之後同佢追，但係佢嘅人品係點樣，我冇得追，我唔通 10 歲先開始教佢有禮貌、教佢做人？我自己有排受。」
她也不是要「贏在起跑線」，「我算係冇咩壓力㗎啦，媽媽 group 嗰啲呢，已經講緊邊間幼稚園，駁到邊間小學，因為小學好影響升中。哇痴線㗎，兩歲我要諗佢 12 歲嘅嘢，我唔諗啦，我淨係諗佢入到邊間幼稚園，佢呢 3 年過得好就 OK。」
兩人一向不擔心兒子的禮貌、社交能力，可是其中一次面試，兒子突然唱反調，吵着要走、老師跟他說話也不作聲。阿欣扮起兒子的輕蔑神情，維妙維肖，「佢真係唔鍾意（那間學校），就算佢收我，我都唔揀。」
阿輝和阿欣在獄中閱讀不少育兒書籍，阿欣更報讀幼兒營養學、幼兒心理學等課程，兩人育兒共識是「父母立場一致」。
「我哋唔想一個特登要做醜人，一個要做好人，咁樣先唔會令到佢咁 confused，唔會話 Mami 一惡，我就痴去 Daddy 度先，等佢幫我啦。」
距離兒子青春期仍很遠，但兩人也幻想過他將來的模樣，甚至是面對感情關係。
阿欣笑說：「應該好靚仔，同我一樣樣，應該唔會有偏差」；阿輝也預計，兒子長大後，「身邊不乏異性」，他說要及早開始性教育，培養正確觀念。
「玩唔係問題，安全最重要，唔好 hurt 到人，唔好亂咁嚟，斬清一段再去下一段，或者你一嚟就開宗明義講，係玩㗎，我唔係認真㗎，你唔 OK 我搵下一個。」
「同埋我哋兩個相處，佢都應該唔會學得太差啩」，阿欣望向阿輝，「佢又唔係花弗」。
「我哋都希望身教，唔係教到嗰啲 fuck boy。」阿輝緊接道，「唔好話一拍拖就同你結婚，一生一世，之後一個禮拜又換畫。」
兩人你一言我一語，阿欣手機傳來語音訊息，是兒子喊着「媽咪媽咪」，打斷這個認真討論。
阿欣聽到兒子聲音，嘻嘻地笑，阿輝不是味兒，「冇叫我嘅⋯⋯」
「吓，佢永遠都唔叫你㗎喎⋯⋯」
原來是兒子從午睡醒來，準備跟爸媽到公園玩。「我哋目標好簡單，我哋就係想佢快樂、健康、幸福咁成長。」
記者：淇
文章来源：法庭线
没有评论:
发表评论
注意：只有此博客的成员才能发布评论。