【初選47人案】多年戰友、義工排隊旁聽撐長毛 雷玉蓮：唔好令佢覺得孤單

【獨媒報導】民主派初選47人案今早繼續進行求情，包括新界西、新界東共8名被告。多年戰友「女長毛」雷玉蓮昨晚才知悉，便急忙請假前來西九龍裁判法院：「唔好令佢覺得孤單，等佢知我哋到咗。」蓮姐表示，長毛即使身陷囹圄，仍多次喚她要多探望戰友古思堯：「長毛撐得住！佢喺獄中都尚且記掛戰友。」

憶昔日行動 念長毛總為戰友行先

除了一共參選新西的被告，根據司法網頁顯示，參與新東初選的梁國雄、柯耀林亦由今日起一併作求情。雷玉蓮今早便請假到法院支持戰友，她早前曾探望長毛，形容對方「撐得住」，並引用蘇東坡的詩句送予長毛：「稽首天中天，毫光放大千，八風吹不動，端坐紫金蓮，佢就係一個咁樣嘅人，無嘢打動得到佢。」她身穿印有蓮花的外衣，寓意47人出於污泥而不染：「所以我要著呢件衫支持佢哋。」

蓮姐對記者談到一件事，多年前與長毛到位於中環下亞厘畢道的舊政府總部抗議，那年頭衝擊鐵馬「正常不過」：「嗰陣時吳恭劭都仲喺度⋯⋯嗰次好多警察，好危險，我哋最後無衝，我哋同警察鬥企。長毛將示威物品掛咗喺度就算，佢想確保所有人都安心。長毛好多時都諗咗人哋先，先諗自己。」

盼47人大步檻過 嘆舊日較少合照

談到47人案的求情即將進入尾聲，蓮姐最希望他們能大步檻過：「最緊要佢哋出到嚟，咩是是非非都唔重要。有啲人求情講甚麼東西，其他人講甚麼東西，每個人處境都唔同，我一個人食得幾多？但當你有家庭、有顧慮嘅時候，你諗嘅嘢都會多咗，你唔會自己都要為佢哋。」

此外，蓮姐有點感慨地說，過往較少與梁國雄、古思堯合照，才發現「影相係咁重要」：「當長毛同阿古入咗去嘅時候，我睇返我哋好少合照，好似一張合照，因為以前成日見到，但世事無常。」

社民連義工坐頭班車 讚長毛很照顧他人

除了多年戰友，亦有社民連義工特地來支持長毛。盧先生今早乘坐頭班車，排隊等候進入法院，前來支持長毛。他表示自2012年接觸長毛，留意到社民連的理念與自己接近，便一直為社民連助選：「左翼、幫弱勢，又係為公義發聲，所以開始幫佢。」

談到與長毛相處最深刻的一件事，盧先生稱「好平常㗎咋喎」：「有一次喺中聯辦門口，警察噴胡椒噴霧，有個義工嘅，後生嘅，長毛一手攬佢埋嚟，用件褸遮住個頭。個義工無事，佢自己兜口兜面食影晒。」他形容長毛其實溫柔，並很照顧他人，而且亦講道理：「唔係出邊話佢市井，其實佢好博學，睇好多書。」

行政會議召集人葉劉淑儀早前接受外媒訪問，稱香港民主20年來的實驗失敗，相信在《基本法》第23條立法後，反對派將長時間不會重臨，更點名「長毛」和「癲狗」黃毓民之流不會再回來立法會。

知悉長毛獄中有情緒病 盼保重撐住

盧先生笑言政治一日都嫌長：「佢無錯嘅，可以將來見到嘅形勢都係咁，唔知㗎呢啲。黎智英都可能會出返嚟，佢講得太早。我哋梗係希望，你應承我哋嘅雙普選，2008年就應該有，你應該兌現，做到真正港人治港。」

另外，盧先生表示知悉長毛在獄中有情緒病，而且頭部生瘡，「佢上庭成日𢲷個頭」：「保重、撐住，平安呀！嗯，入邊嘅人都係講呢啲。但我哋講啲咩說話對佢無作用，係要靠佢自己意志。」

柯耀林亦被安排在今日起作求情，去年曾任柯耀林mentee的阿偲，指與柯交流時，感覺他不太開心，嘆很多朋友已不在港，而柯初罪成還柙後仍「有講有笑」、鼓勵她，不過近來情況變差，「多咗亂諗嘢」。阿偲指，到場旁聽望給予柯耀林支持：「畀佢覺得，無論咩時候都有人陪住佢、撐住佢。」