分享：
支聯會及前正副主席李卓人、何俊仁、鄒幸彤被控「煽動顛覆國家政權」案，周四（22 日）在西九龍裁判法院（暫代高院）開審。前支聯會常委鄧岳君周一下午到法院外排隊輪候旁聽，他衣着單薄，有朋友為他送來外置充電器。
鄧向《法庭線》記者稱，希望確認「我哋係第一個」，又稱「支聯會案無理由要讓一啲唔應該咁熱心嘅人嚟咁熱心，咁（讓）應該熱心啲人嚟熱心啫」。他又稱有「好可悲嘅感覺，37 年前嘅悲劇延伸到嚟呢度，有相關嘅審訊」，望「盡快解開呢個結」。
周一下午 4 時半所見，法院外暫未圍起鐵馬，而法院另一側有 20 間傳媒以椅子及紙張輪候記者席籌號。天文台預測周二晚上氣溫將顯著下降，周三將低見 12 度。
支聯會被指煽顛案專頁
鄧岳君：確認我哋係第一個
《法庭線》記者發現周一下午約 4 時半，看到鄧岳君在西九龍法院側排隊，隊伍只有他一人。他衣着比較單薄，帶了報紙到場，稱原打算「過嚟望吓個環境，見到竟然無人（排隊）喎」，故決定開始排隊，「確認我哋係第一個」，期間有前支聯會義工送來外置充電器。
「我覺得將會係一個好長嘅審訊⋯⋯（排隊是為）開頭做一個象徵意義嘅表示」。記者問為何確認第一個如此重要，鄧稱「因為據聞好多時都會有啲相關人士，好熱心地要排頭位，我諗我哋喺支聯會案，無理由要讓一啲唔應該咁熱心嘅人嚟咁熱心，咁（讓）應該熱心啲人嚟熱心啫」。
鄧續指，支聯會多年一直在香港，情懷扣連中國內地，而他「有種好可悲嘅感覺，37 年前嘅一個悲劇延伸到嚟呢度，有一個相關嘅審訊，希望喺呢件事上面，大家可以盡快解開呢個結」。
案件周四開審
本案 4 被告被控《國安法》煽動顛覆國家政權罪，控罪指他們透過「非法手段」推翻、破壞中國憲法所確立的根本制度，或推翻中央政權機關。
李卓人 3 人已還押多時，其中何俊仁早前改擬認罪。法庭早前已裁定鄒幸彤申請撤銷公訴書失敗（見報道），將於周三（ 21 日）頒下書面判詞。而案件預定於周四（22 日）早上開審。
HCCC155/2022
文章来源：法庭线
没有评论:
发表评论
注意：只有此博客的成员才能发布评论。