分享：
宏福苑大火聽證會周四（26 日）踏入第四日，亦是大火發生四個月。10 名居民作證，部分人提及自救及逃生經過。其中 85 歲的冼善卿開風扇吹走濃煙；居民張次濂帶走行動不便的鄰居，又用水淋濕棚網，待消防破門後，心想「點解有咁多天使喺度」，才發現是消防員頭燈。
部分人則提及大維修招標等事宜，其中一人質疑承建商宏業中標有內情；另一人則稱，聽聞區議員黃碧嬌的義工向住戶索取授權信。另外，競委會周三就宏福苑大維修入稟控告 6 公司涉圍標，競委會代表指，檢控暫不包括宏業及工程顧問鴻毅，但調查仍在進行中，不排除牽涉更多圍標集團及繼續檢控。
相關報道：
遇難者家屬：對宏業董事拒出席感失望 ICU被點名通水應作供
首名報案居民：致電 999 竟線路繁忙
其中 4 位作證居民均居於最早起火的宏昌閣。住 1005 室的王嘉婉為首名報案居民，自大維修搭棚後，不時在家中聞到煙味，但未曾投訴。大火當日下午約 2 時 50 分，她再聞到煙味，先檢查廚房爐頭，沒發現異常，再打開窗，聽到外面有工人大叫「火燭」，遂關窗離開。
王離開單位後見到鄰居，對方表示獲管理處職員告知「個棚炳著咗啲嘢」，王立即報警，「等咗好耐先有人聽，第一次竟然係線路繁忙」，來回兩至三次，「廣東話英文普通話都聽咗，我真係等咗好耐」。電話接通後，警方著她離開，王遂行樓梯離開。
她約 2 時 55 分抵達大堂，當時仍有等升降機的人、保安及管理處職員等人在場，王大叫「火燭」後離開，當時曾回頭望，見「火已經燒高過宏昌閣」，遂到母親位於廣福邨單位休息，繼續留意宏福苑火勢。她指，初時見消防員救火，水源只達 1 樓，未能撲救 2 樓火源﹐單位的窗亦陸續被燒成橙色，最後連母親廣福邨的單位都要疏散。
王最後表示：「我希望⋯⋯可能好渺茫，但搵返點解會火燭，造成火警嘅原因，消防處點解唔夠水。」
遺屬：母最後寄語好好生活
遺屬羅曉琪（Phyllis）供稱，與媽媽、哥哥居於宏昌閣 808 室，指當日 3 時 02 分在家庭群組收到母親訊息，提及火警、打開門有煙。羅隨即致電媽媽，着她用濕毛巾堵塞門縫，指媽媽比較驚慌，稱「攝到上面攝唔到下面」、「死喇死喇、今次死喇，周圍都見到火光同煙」。
羅當時着母親冷靜、用濕毛巾掩口鼻躲在廁所等候救援，母親最後跟她說：「你同哥哥好好生活」。羅指，馬上趕回大埔，途中致電母親數次，在屋苑對出石油氣站下車時已火勢猛烈，「有火屎喺宏福苑彈過嚟」，最終知悉母親去世。
遺屬：以人命喚醒香港代價太大
羅又指，自己申請成為涉事方因很想找出真相，「好想知道點解我最後同媽咪講嘢幾分鐘，幾分鐘已經咁大煙咁大火，究竟咩原因令到火警咁嚴重，又冇警鐘啦，火警水缸又冇水，令到救火好困難。」
她指，「我相信死一個人都嫌多，今次仲 160 幾人，如果要用依 160 幾條人命先可以喚醒香港，我覺得實際係太大代價」。她提到，本身對委員會期望不高，但由首日聽證會至今，感受到委員會認真對待，「我相信委員會有咁嘅能力，相信你哋會徹查到底。如果法例上係有漏洞嘅，咁一定要填補。」
她又指，有居民作證時自責，「佢哋都覺得自己可以承擔更加多，喺呢件事上關事嘅單位、政府部門同埋一啲建築商人，佢哋係咪都要負上責任呢？好希望委員會畀到我哋遇難者同埋 1,900 幾戶人嘅公道。」
主席陸啟康指，「我哋都喺社交媒體見到你接受訪問，希望你節哀順變，唯一可以畀返你媽咪嘅係，我哋會全力做返一個公正、全面嘅調查，話返畀你聽究竟發生咩事，我哋會盡我哋能力。」
宏昌居民：逃生期間很靜、沒警鐘
與妻子居於宏昌閣 605 室的陳全憶述，下午 2 時 51 分，他聞到燒焦味，曾致電管理處了解，再見到外牆「有少少火」，當時已有大量煙傳入屋內。陳報警後離開，落樓時遇見一名街坊，對方表示好辛苦，「行行吓唔見咗」，他遂折返扶着這位街坊一同離開。他又指，逃生期間「好靜、冇警鐘」。
陳又提到，「我自己大廈傷亡咗咁多人，啲街坊我哋見到都一殼眼淚」，提到一名街坊於大火當日一直等候丈夫消息，後來再見到對方時，才知悉其丈夫已過身，「以前見到佢哋三個人，有小朋友讀緊中學，開開心心，但係再睇唔到呢個畫面。」
兩清潔工爬上天台至翌日獲救
至於住在宏昌閣 305 室的吳靄詩指，乘小巴回家期間聽到宏福苑起火，到附近時見有大量濃煙。她指，大維修時經常聞到煙味，從窗外亦會見煙頭、建築廢物。她又指，光井平台滿佈垃圾，工程期間「每日聽到有嘢跌落去」，聽到石屎碎片、建築材料着地聲音。
兩名外牆清潔工人黃足蓮及姚順友則於起火當天，在宏昌閣外牆棚架工作。大火當天，二人清洗外牆時，聽到有人大叫火燭，遂由 27 樓棚架爬上天台，等至翌日由消防員救起。他們均指，在宏福苑工作前曾上安全課，了解使用安全帶等知識，有提醒不要吸煙，但沒談及火警注意事項。
宏泰居民：待救 5 小時感絕望
另外兩名作證居民居於第二幢起火的宏泰閣，講述逃生經過。
起火當天，住宏泰閣 1006 室的張次濂與妻子在單位內。他憶述，收到訊息指宏福苑起火，遂打開窗望向宏昌閣，見火舌飄過其單位附近的棚網，及後見窗外亦起火。張着妻子到廁所取水，他再爬出窗外用水救火，「上面好多火舌跌落嚟，我個頭髮都燒燶咗少少」，遂離開單位。
庭上播放張拍攝的起火片段，有聲音表示「我屋企著咗火仆街喇」、「裝桶水畀我，攞水去救，嗱嗱聲、攞水嚟」。
張發現無法滅火後，決定與妻子離開單位。二人想起有鄰居行動不便，遂拍門着對方一同離開。但他們打開防火門時，發現有大量濃煙。張着妻子帶鄰居走另一邊的樓梯，但「老婆走返轉頭話好大煙」。
三人遂返回張的單位待救，繼續嘗試用水救火，約 20 分鐘後單位先後停電停水。屋內只剩下一桶水，張對妻子說：「嗰桶唔好搞喇，要嚟救命」。
他們曾報警，消防員回電了解單位待救人數。張指，當時已用物品塞着門罅，但仍有煙攻入單位，最後妻子在廁所暫避，張及鄰居則到睡房暫避，三人於等候期間不斷用濕毛巾掩面，但「毛巾幾分鐘就乾」。
張憶述，等至 6 時半已感絕望、「個人放棄咗」。鄰居稱「唞唔到氣，我好辛苦，頂唔順啦」，張亦「迷迷糊糊」，妻子在廁所為眾人祈禱鼓勵。其後消防員再打來查問單位人數，張一度「發脾氣」稱：「你問來問去都係問呢啲問題，都唔來救我哋，上網睇死咗 43 人，你再唔上嚟，你同我加多 3 個人上去 46 人。」
及至 8 時，張聽到有敲門聲，當時感到「好攰好想瞓」，突然再聽到撞門聲，心想「道門幾千蚊你撞爛點樣呀，成個人扎醒咗，我走去開門」。當時只能摸着鋼琴、餐桌伸手向前，摸到門後發現「道門辣手」，無法開門鎖。
張：見消防以為見到天使
消防其後破門入屋，張形容「望到有 5、6 個天使喺度」，心想「點解有咁多天使喺度⋯⋯發現原來係消防員頭頂盞燈，我諗我係咪死咗呢？點解咁快見到天使？」消防員隨即問「有冇人受傷」，張遂清醒過來，請消防救妻子，並表示鄰居在房內，張已感全身無力。消防員給他透明罩，着張靠在消防員背上，由消防員背着離開。他記得消防員下樓時，與他一同跌低。
張指，當日情景「到依家都抽唔返出嚟，喺我心目中」。他當時欲扶牆，但發現牆身「辣手」；再靠在消防員背上，對方行幾步再跌倒，之後「扯吓落吓，落多幾層」。張一度想跟消防員說「唔好理我喇，你擺低我喺度啦，我好眼瞓，你走啦」，最終成功落樓送院。張語帶哽咽指，醫院情況「好恐佈」，並於會上感謝消防及救護。
張：曾反映 8 座同時圍網危險
針對大維修，張指自己退休前從事工程，曾向新法團反映，8 座大樓同時圍上棚網相當危險，遇火警會「火燒連環船」。他亦曾關注發泡膠及樓梯「生口」問題，並向法團及宏業指出做法不安全。
他又指，曾於後樓梯見有可樂樽裝有水及大量煙頭，亦聞到煙味，棚架上又發現煙盒。他曾就此到宏業辦公室通知對方，對方僅稱會跟進，又質疑或非工人吸煙，「可能樓上掉落嚟」。及後工程要維修窗台，張再發現煙盒並再次向宏業反映，指樓上不可能把煙盒掉至窗台。
張最後指，過往居民多次投訴，「政府又話唔關呢個部門事，咁我哋居民好無奈，呢個犧牲真係好大，死咗 168 人，全部都係家破，甚至人亡，呢個代價相當大，先呼喚到政府，棚架落晒網」，希望政府作出承擔，「呢件事唔可以再發生」，又寄語其他居民，「我哋要振作啲、努力啲、度過呢個難關。」
85歲宏泰居民：「係宏福苑小錯畀我逃生」
85歲、住宏泰閣 1406 室的冼善卿作證指，大火當日她正準備出門，見大堂有煙，疑發生火燭，隨即關門用濕毛巾堵塞門縫。
她形容，「係宏福苑小錯畀我逃生」，解釋因警鐘沒響導致單位有電，她遂開抽油煙機、窗戶、風扇，將濃煙吹出，並報警求助。她憶述，當時不斷想辦法自救，用水淋熄棚網，又提到其單位外棚網沒受颱風影響，毋須換新網，事後才知原來新網易燃。
她續指，她本想爬出竹棚，惟擔心會「跌落街」放棄。及後有警察接聽其電話，語氣平和，着她不要掛上電話，使她沒那麼緊張。
冼：消防叫我檻過「大公仔」
後來她聽到咇咇聲，出力捶大門後，4 個消防員進入單位，為她戴上罩，又問「婆婆你間屋冇煙嘅？」冼向他們介紹其自救方法，「佢畀 4 隻手指公畀我」。委員會代表杜淦堃展示冼單位的照片，冼指單位情況「都算良好喎」。
冼憶述，消防員問她可否行樓梯離開，她說「我要生存，唔得都要得」。消防員指，「但 12 樓有個大公仔，小心佢棘到你，唔使驚」。冼稱，當時沒意識甚麼是「大公仔」，一度以為是「細蚊仔啲大玩具」，後來意識到是遺體。
冼指，到達 12 樓後，消防員稱「你檻過佢啦」，並哽咽稱兩個消防員也帶走該具遺體。「我依家都係好感動，我覺得香港真係好驕傲，好專業嘅消防員，雖然佢死咗，但早啲帶離現場，家人會好過啲。」
宏福苑大火三個月專訪 開窗散濃煙、淋熄棚網火種 85歲冼婆婆逃生記
陸啟康：感謝從悲傷事件帶來正能量
冼稱，獲救時已在 9 時後，再次感謝消防及警員，「呢場經歷，喺我人生裡面，我估計我呢一生人，雖然未必會長，但係會永遠記得。」
陸啟康亦向冼指，「我覺得你都係香港嘅驕傲，你喺咁危急嘅時候可以諗咁多方法可以去保障你自己，你都好叻，你嘅證供幫我哋之餘，都可以畀一啲正能量，喺咁悲痛嘅事入面，帶一啲正能量畀香港，我覺得你好了不起，好多謝你出席。」
宏建居民：遺憾無法逐戶敲門
另外，宏建閣 30 樓居民文家峻於會上讀出自己證供，指事發當日在家中聞到「燶味」後，聽到「霹靂拍勒」聲，見窗外下方建築材料開始燃燒，隨即着家人離開。
他起初嘗試淋水救火、敲警鐘、拉消防喉欲救火，均不成功，指消防喉只有極少量水。而他離開前先在樓層走一圈，看有沒有鄰居需要幫忙，下樓途中亦盡量巡視其他樓層，通知居民逃生，持續嘗試敲警鐘。
他指，當時在樓層內不斷「行圈」，希望盡量拍門，但無法逐戶敲門，又指期間可能行錯，以為有兩名受困長者已成功逃生，作供時表示「對唔住」。主席陸啟康安慰指，「好多時你會回想可否做得更多，但你已經做得好好」。
居民遛狗逃過一劫
住宏泰閣 108 室的鄭敬熙在會上指，起火當日只有他與愛犬「拖肥」在家。他下午帶「拖肥」下樓，指「拖肥」當日反常地繞過宏昌閣出屋苑後閘，在元洲仔公園玩耍，又不願回家，結果回到廣福邨時已大約 3 時，見宏昌閣滿佈黑煙，其單位亦受波及。
鄭希望委員會為逝者找尋真相，亦「希望逃過一劫嘅邨民，大家振作啲」。
失雙親居民：大部分街坊不欲選宏業
聽證會上，亦有居民提到疑圍標、假授權票事宜。住宏泰閣 2602 室的阮仲文供稱，大火當日趕回大埔，尋找住在同一幢的父母不果，最後確認兩人去世。阮指，因任職食肆牌照申請，有留意後樓梯的防火窗變成「生口」、發泡膠封窗事宜。
阮另提到，業主大會挑選維修承建商時，據其觀察，「大部分街坊都唔想揀中標嗰間，唔知點解開票時中標，佢係最高票，仲要（比其他入標商）多好多，一定背後有啲嘢唔清楚。」
居民王淑蘭：聽聞黃碧嬌義工索授權信
住宏志閣 403 室的王淑蘭與兒子同住，她在大埔街市接手母親攤檔。王稱，因法團指定業主本人出席業主大會，要提供身份證號碼，而單位業主是胞弟，加上不想個人資料流出，故她未有出席大會。王形容，「住喺宏福苑好冇安全感」，如跟管委會持不同意見會被罵。
王又指，在街市工作接觸很多街坊，有街坊提及區議員黃碧嬌的義工，會向住戶索取授權信，「老人家好多時都怕事，就畀咗佢」，又指曾見黃和義工與居民就大維修爭吵，也聽聞有假授權票。
她形容，招標過程「黑暗」，「我哋爭取、反對好多嘢，我哋永遠都係失敗，亦都係好多人干擾我哋」，又提及大埔另一屋苑八號花園的大維修計劃，每戶要分攤 30 萬元，「又係有民建聯嘅」。
競委會代表：不排除宏福苑涉更多圍標集團
競委會周三入稟審裁處就宏福苑大維修控告 6 間公司涉圍標。競委會代表在會上指，現階段答辯人尚未抗辯，競委會「拭目以待」，「想睇吓答辯人點樣解釋佢哋會『收功課』、『交功課』，點解會有主角，點解會有幫手，點解競爭者與競爭者之間收到功課即係價格提示，照咁樣將功課提交畀招標者。」
他又指，被檢控公司暫不包括承建商宏業、工程顧問鴻毅，但調查尚未完成，不排除牽涉兩個或以上圍標集團，亦不排除繼續有檢控，「希望大眾畀少少耐性」。
他提到，若競委會說法屬實，將成為香港《競爭條例》下第一宗檢控的圍標集團，並指涉案金額高達 7 億元，又指圍標不一定罰款了事，若涉虛假陳述，可能構成串謀詐騙，「遊戲規則已經改變」。
文章来源：法庭线
没有评论:
发表评论
注意：只有此博客的成员才能发布评论。