分享：
47 名民主派被控「串謀顛覆國家政權」罪一案，周一（20 日）在西九龍裁判法院（暫代高院）展開第 11 天審訊。控方播放新界東論壇片段，被告觀看梁國雄質疑嘉賓、指自己或於《國安法》實施後被控煽動顛覆國家政權罪時，分別大笑和起哄。梁則未有反應。 控方又播放部分超級區議會的論壇片段。至於新界西論壇，法官指該地方選區所有參選人已認罪，故毋須播片，控方指可證明串謀存在及其程度，其後在沒有辯方反對下，法庭未有播畢完整片段。 此外，代表何桂藍的大律師 Trevor Beel 於播片前促控方指出，會依賴作指控何的片中發言。控方一度指現階段不適合回應，後在法官關注下同意，於辯方盤問前作出回應（見另稿）。審訊周二（21 日）續。
區諾軒逐一辨認新界東論壇的出席者
控方早前確認引用「共謀者原則」 ，依賴其他出席者的發言，對各被告作出指控，並於上周完成播放九西、九東、港島 3 個選區的片段。身穿灰色冷衫、深藍色裇衫的區諾軒周一繼續作供。
控方在播放新界東的論壇片段前，請區逐一辨認新界東論壇的出席者，他確認出席者包括：楊岳橋、梁國雄、林景楠、林卓廷、陳志全、李芝融、鄒家成、何桂藍、范國威、黎銘澤、李志宏、劉頴匡、柯耀林、呂智恆，以及主持黃潔慧。
法庭翻譯名字時，區一度指正，並讀出黎銘澤的正確名字。其中 6 人，包括何桂藍、陳志全、鄒家成、林卓廷、梁國雄、柯耀林不認罪。當播放論壇片段時，區一時托腮、一時撓著雙手，全神貫注地望向被告席上方的螢幕觀看片段，有時面露微笑。
片中鄒家成：
代表香港民族意志 對抗中國殖民
本土派的鄒家成於論壇發言，多次重申「攬炒」，「今日參選係因為我要代表香港民族嘅意志，對抗中國殖民。法治已死，制度沉淪，呢一刻，香港需要嘅，唔再係西裝骨骨嘅政客為大家議政，而係需要具備攬炒意思嘅抗爭者為大家衝擊體制，撕下香港政治上最後一塊畫皮。」
另鄒在提問另一參選人楊岳橋時，怒斥泛民未能帶領港人，「今日我哋睇到泛民主派就係永遠都走唔出呢個一國兩制嘅困局，不斷帶住香港人兜圈兜咗二十三年都走唔出呢一個迷宮。我今日參選，就係要令到未來呢一塊政治版圖變得清清楚楚。未來我唔要三分天下，我要兩分天下，未來只會有親中派，同埋本土嘅抗爭。」在被告席的鄒挨著椅背望向屏幕，林卓廷亦一度望向鄒，鄒間中亦低頭使用電腦。
片中何桂藍：
要將立法會變成人民武器
另一參選人、前記者何桂藍則重申要奪取主導權，「立法會要過半，我哋唔係講緊再投議員入去議事咁簡單，而係要奪取主導權，將立法會變成人民嘅武器。 要突破中共 set 畀香港嘅死局，需要最多嘅抗爭派進入議會。」在被告席的何桂藍，觀看片段時一度揉鼻及露出笑眼。
嘉賓李慧玲問及，愈來愈少人做傳媒，問何桂藍為何放棄做記者。何指，要入立法會破局，「立法會唔再係一個議事嘅殿堂，亦只係一個抗爭嘅陣地，所以我呢點解講緊要透過立法會嚟到去破局。」
另林卓廷在「自由搏擊」環節問何桂藍，如何解決「警黑勾結」的局面？何稱，中國公安部長指導香港警察工作，故警暴難以在本地層次解決，「我哋必須要畀到最大嘅政治壓力中共，所以點解立法會係需要大家抗爭派嘅朋友，入到去一齊去破局。」
片中陳志全：議會抗爭要升級
「難度愈嚟愈高 愈嚟愈樣衰」
人民力量陳志全（慢必）則稱，初選可讓大家有機會挑選真正抗爭派的議員，重申「人民力量過去係走在抗爭最前線，最早最可靠嘅抗爭力量。」另陳志全被劉頴匡問及，議會抗議中扔「遺臭萬年水」的配方。眾被告大笑。
陳在片中回應時稱，不便透露，稱因為隨時會被控告。他又稱，「但係我想講就係其實而家議會嘅抗爭真係要升級，升級嘅意思係，其實議會抗爭嘅目的係乜嘢⋯⋯我去掟呢個遺臭萬年水究竟係成功定係失敗呢，議會抗爭就係要令政府要通過啲惡法或者係撥款嘅時候，就係難度愈嚟愈高同埋要愈嚟愈樣衰。」
片中梁國雄：國安法後或被控煽動顛覆政權
庭上被告起哄
社民連的梁國雄在嘉賓提問時，手取一張選舉海報。李慧玲問，他現時參選與以往有何分別，梁稱「好似呢個海報就係我 20 年前競選，有啲係做到，有啲做唔到⋯⋯ 咁結束中共一黨專政，釋放所有政治犯未做到」，他又指，35+ 是最大戰略，「我呢係要攞一個全面嘅否決權，操諸我手」；他一度提及「其實老實講，國安法嚟咗之後，可能我都被控呢個煽動顛覆國家政權罪⋯⋯」隨即引起被告起哄，梁則一臉茫然，未有反應。
李慧玲續質疑梁仍然參選，是否戀棧？梁立刻反駁：「嘩，我又覺得你好怪喎。你正話話立場姐姐嗰陣時就話人哋資歷淺走咗去喎。你真係你啲邏輯喺邊度呢？」此時庭上不少被告大笑，林卓廷更一度笑著舉起拇指。
被問到為何未有簽「墨落無悔」，梁稱，因為只是重複 35+ 初衷，「其中舉個例就係話要一定否決嗰個財政預算案。咁我做咗咁多年議員都係否決嘅，年年都，咁我覺得即係呢個問題對我嚟講已經唔係問題。」
片中林卓廷被質疑未有全面抗爭
林：如派 3 萬蚊要贊成預算案
至於民主黨的林卓廷被李慧玲問及，立法會通過張舉能出任終院首席法官，泛民投棄權票一事。林回應稱，「其實過去咁多年以嚟，立法會嘅傳統呢，我哋都係尊重嗰個司法嘅獨立⋯⋯我哋睇到仲係有啲法官，都係堅守佢哋嘅崗位，我哋見到有好多喺法庭上面，打甩嘅案件，見到好多警察去到上法庭畀口供⋯⋯法官係唔信佢哋嘅口供，將佢口供掉出個法庭外面㗎。」
李慧玲再次質疑他並非全面抗爭時，林回應道：「嗱，好簡單一個例子，如果政府話『每個香港人派三萬蚊』，我覺得一定要投贊成票喎⋯冇理由留番啲錢畀政府去做大白象工程㗎嘛，係咪呀？」
片中柯耀林：
希望與香港人齊上齊落
區政聯盟的柯耀林發言時稱，希望行動與議會「雙結合」，指他的團隊不時在衝突現場前線支援，重申「希望同大家香港人齊上齊落，五大訴求，缺一不可」。另他被嘉賓桑普問及，民主黨的新東黨部出現糾紛，柯曾斥責林卓廷「人格卑劣」，柯表示同意。在被告席的林卓廷隨即笑，更一度點頭，亦有旁聽人士發笑。
柯耀林總結時稱，「香港人一定要有抗爭意志，所以我好希望呢，透過今次嘅 35+ 初選呢，大家支持係有抗爭意志嘅參選人。」
官指新西參選人全認罪 毋須播片
控方：可證串謀存在及程度
控方播畢新界東的論壇片段，區確認論壇流程，與他所設計一樣，稱「所有環節包括得罪人嘅環節，都係我設計，都係吻合嘅。」另他不記得有否出席該次論壇， 但有出席大部分論壇。
控方其後播放新界西的論壇片段。區諾軒確認出席者包括：林進、伍健偉、譚凱邦、潘朗聰、朱凱迪、吳敏兒、郭家麒、張可森、黃子悅，主持則為梁家權。
當片段播放約 10 分鐘，李運騰打斷問，新界西所有參選人是否均認罪，為何控方需要播放片段？控方確認，並稱片段可以證明串謀的存在及其程度（the existence of conspiracy and the extent of conspiracy）。李續指，除非有辯方堅持，否則不用在法庭上播放此片段，在未有辯方反對下，控方遂播放超區的論壇片段。
控方播超區論壇片
片中李予信：濫捕要用職權指正
控方再請區諾軒辨認超區論壇的出席者，區確認出席者為涂謹申、李予信、岑敖暉、王百羽、鄺俊宇，以及主持區家麟；其中涂謹申、鄺俊宇未有被落案起訴。
公民黨的李予信為該地方選區唯一不認罪的被告。他發言時稱，他作為社工、區議員，進行人道支援時遭「黑警濫暴」，斥警察肆意欺壓香港人的自由。他提到，《國安法》全面滲透香港所有領域，希望大家並肩作戰，「無論喺街頭上面又好，無論係自己嘅崗位上面，無論喺議會內外，我哋一齊去做⋯⋯但係我相信信念係刀槍不入嘅，我哋要守住自己嘅地方就係守住我哋嘅價值。」
李又多番強調抗爭的重要，「其實當極權要全方位滲透呢個社會嘅時候，我哋嘅戰場就係全方位地去應對，無論街頭或者議會，所有嘅抗爭呢都係我哋要去做嘅嘢⋯⋯我認為立法會議員應該要用佢嘅公共身分，當黑警濫捕，當黑警唔跟法規，公權力唔受約束嘅時候，我哋要用我哋職權出嚟指正⋯⋯」
片中王百羽提「身位」 被告大笑
片中涂謹申：我有坐監準備
超區另一參選人王百羽發言時提及，如果被阻止議事抗爭，「我會用我自己嘅身位，超區坦克車，將呢啲咁樣阻住我哋議事嘅垃圾，立法會親中保皇議員，一個一個車出去議事堂⋯⋯」。庭上被告大笑，在延伸庭旁聽的岑敖暉、譚凱邦、袁嘉蔚及吳敏兒均露出笑眼，譚凱邦、袁嘉蔚更一度笑至頭仰後。
民主黨涂謹申發言時稱「我有坐監嘅準備，我有一切負擔最壞嘅後果嘅準備」。他又被問到，資深議員現時是否仍有作為？他稱有，又指如果屆時由石禮謙、張宇人等獲勝，就算成功奪得35+，可以想像（建制派）拉布，選不到主席等，「我相信呢，個《國安法》唔會告佢㗎喎⋯⋯」被告席隨即傳出「嘩」聲。
同屬民主黨的鄺俊宇發言時稱，如果議席過半，「大家想像下，我哋可以堵截大白象嘅工程， 我哋可以幫助窮人基層，我哋可以否決財政預算案，呢一啲嘅想像未發生，冇人知得唔得，但係如果乜都唔試就乜都唔得。」
16 人不認罪受審
本案 16 名不認罪被告，分別為吳政亨、鄭達鴻、楊雪盈、彭卓棋、何啟明、劉偉聰、黃碧雲、施德來、何桂藍、陳志全、鄒家成、林卓廷、梁國雄、柯耀林、李予信及余慧明。
不認罪被告當中， 10 人獲准保釋， 6 人包括吳政亨、何桂藍、鄒家成等正還押，其中 4 人被押逾 700 天。認罪列席被告，繼續被拆至延伸庭分座，其中首延伸庭包括袁嘉蔚、岑敖暉、吳敏兒、譚凱邦。另因旁聽人士人數不多，未有開放第二延伸庭，該庭亦不設記者席。
HCCC69/2022
文章来源：法庭线
没有评论:
发表评论
注意：只有此博客的成员才能发布评论。