分享：
參與新西初選、選擇認罪的伍健偉沒有律師代表，他親自陳情，期間不時望筆記，而張可森、黃子悅、譚凱邦、郭家麒亦數度望向伍。
伍提及參與「35+」的其中一個原因，是不希望有人受傷、被捕，甚至再有人犧牲生命，他選擇參與「35+」因為手段是和平、理性、非暴力。伍又稱，「五大訴求」合情合理，沒有被法庭裁定違法，「我哋唔係追求緊一個虛無飄渺，海市蜃樓嘅願望」，訴求對政府而言是「是不為也」，而非「不能為也」，法官陳慶偉打斷。
法官李運騰問及，伍是否沒有悔意？伍答「無錯」，指作為政治人物，期許自己要有承擔，竭盡所能，留守到最後一刻，「所以我並唔後悔，我選擇留喺香港，我需要兌現我莊嚴嘅承諾，同香港人齊上齊落」。
新西被告庭上求情報道
法院外報道
47人案審訊 求情、裁決日報道一覽
以下為記者抄寫伍健偉陳情的庭上紀錄（口語，小題為編輯所加）：
喺我正式陳詞之前，我想向之前代表我嘅專業資深大律師、大律師以及律師團隊感謝佢哋熱心同埋專業嘅服務。
另外我感恩社會各界對我哋嘅關心同埋支持，最後我感激每個愛我嘅人對我嘅付出同埋犧牲，我祝福各位平安健康，就住控方對於《國安法》裡面，首要分子同罪行重大嘅解讀，喺法律原則上，我無咩補充。
我相信法官、控方同埋一眾辯方律師，喺法律原則上嘅議題，處理得比我好好多。所以喺如何定義「首要分子」呢件事上，我無咩想補充，正如我喺較早之前 6 月 24 日上嘅陳詞。
我認為喺本案入面，我係一個積極參與者。不過控方指出，罪行重大嘅係要考慮被告或者本案嘅一啲原則，就住嗰啲原則，我希望向法庭提供幾個觀點。
指初選陽光下進行 61 萬名市民投票
第一點，法官閣下，本案「35+」計劃係一個喺陽光底下進行、眾所周知嘅計劃。我哋計劃裡面進行嘅手段同埋目的，都係清晰明確而為人熟知嘅。
我希望 3 位法官考慮嘅係，要達至我哋本案最終進入立法會，無差別否決《財政預算案》呢一件事，單靠我哋 47 個被告係無可能完成。要進入立法會成為議員，係需要廣大嘅香港市民向我哋授權。
而廣大市民對於願唔願意授權畀我哋進入立法會呢件事上，我認為其中一個背景，係（2020 年）7 月《港區國安法》實施之後，有超過 61 萬嘅香港市民喺 7 月 11、12 日，參與咗我哋「35+」計劃嘅初選。
法官閣下。毫無疑問，大家對於係咪違反《港區國安法》，喺當其時對我而言，唔係一個絕對唔違法嘅情況，換句話說，參與投票嘅 61 萬市民，亦都係冒住犯上法律嘅風險，去進行嗰一個嘅投票。
法官閣下，我作為一個民意嘅代表，除咗我有責任去遵守法律嘅義務之外，我嘅首要責任係為選民去爭取佢哋嘅合理訴求。作為一個代議士，我哋有責任去保護支持我嘅香港市民，喺咁嘅情況下，希望法官喺考慮本案嘅罪行性質嘅時候，考慮各位被告，佢哋之所以犯下本案嘅原因，並唔係出現個人嘅利益同埋私利。
同意可致憲政危機 不同意是災難
我想邀請法庭考慮第二點嘅係，法官閣下我同意本案造成嘅後果，可以引致一個憲政嘅危機。但係我唔同意，呢個係一個憲政嘅災難。喺《基本法》下，第 50、51、52 條，本身其實已經有預計過發生相關嘅情況嘅時候，法律授權我哋嘅特區政府點樣去處理呢件事。
當然，嚴重干預政府施政嘅效率係無可避免，但係喺《港區國安法》第 22 條裡面。我認為，各位被告充其量都係干犯咗第三條。
指「五大訴求」合情理 手段屬和理非
法官閣下，「五大訴求」係一個合情合理，無被法庭裁定違法嘅訴求。
但係我想指出嘅係，「五大訴求」對於特區政府係「是不為也」，而非「不能為也」，至少「五大訴求」嘅第一項，撤回逃犯修訂條例，早在我哋 7 月之前已經係滿足咗，喺呢個情況下，我邀請法庭去考慮嘅係，我哋唔係追求緊一個虛無飄渺，海市蜃樓嘅願望。香港市民就住「五大訴求」嘅每一個訴求（法官陳慶偉打斷，指今日處理求情，法庭不是發表政見地方）。
明白法官你嘅立場嘅（頓一頓）。至於第三點，就住我哋本案個性質係咪罪行重大。我希望法庭考慮嘅係，喺當其時嘅時空嘅背景，明白嘅法官，雖然我自己定位係積極參與者啫。但係假如 3 位法官唔同意嘅話，我都希望就住另外嗰兩個 categories，作出一啲嘅回應。不過我第一部分嘅陳詞差唔多㗎喇。
正如我啱啱所講，我希望法官考慮當其時嘅背景，喺當其時，街頭嘅激烈衝突已經持續咗非常耐嘅時間，正如喺我嘅陳詞裡面所講，我唔希望有人受傷，唔希望有人被捕，更加唔希望再有人因為政治事件而犧牲佢哋嘅生命，所以，我選擇參與「35+」初選計劃，因為至少呢一個手段雖然係違法，但係呢個手段，係和平、理性、非暴力。
指政府官員曾指初選「可能」違法
（法官追問何時知 35+ 計劃可能違法）法官閣下，我嘅認知係 2021 年 1 月，我被拘捕嘅時候…我同意法官所講…如果容我去準確咁樣講，我對於參加「35+」初選有可能違法，係 7 月 12 號，初選投票結束之後，我哋嘅政府官員以及我唔記得係中聯辦定港澳辦呀 Sorry，佢哋發出嘅聲明，大概係嗰一啲嘅時段。
（法官指如高官發聲，時間會早於初選投票日）法官閣下，喺初選之前呢，我記得官員係曾國衞先生係有提出嘅，不過佢提出嘅係「可能」違法。
法官閣下，我想用市民嘅角度，我有理由相信，政府係唔會任由罪案發生，容我舉一個例子，有一個人計劃揸車去打劫，佢有無真係違法，當然係由法庭去處理啦，而就算執法部門，都通常只會回覆我哋，呢個行為可能係涉及違法。
但係如果呢件事，係一個咁明確嘅違法罪行，我有理由相信，政府嘅執法部門，唔會容許成件事發生，發生完之後半年都無進行任何嘅執法。
承認控罪 「為個人過去一切言行負責」
法官閣下，咁我就住我個人嘅背景開始陳詞。本人現齡 28 歲，現正喺監獄裡面修讀香港都會大學榮譽學士課程，未婚，係一個恨嫁嘅男人。我喺 2021 年 2 月 28 日被提控本案之前，無任何定罪紀錄。
喺 2020 至 2021 年期間，我透過選舉，成為元朗區議員。我喺 2022 年嘅 6 月 24 日，透過當時嘅代表律師向法庭表達我認罪嘅意向。
法官閣下，我承認串謀顛覆國家政權。我為我個人嘅過去一切嘅言行而負責。今日我想喺度向 3 位法官交代，我喺案發期間嘅想法同埋犯案嘅原因，希望 3 位法官可以給予我一定嘅耐性同埋包容。
法官閣下。我喺 1995 年出世，自從 1997 年以來，香港涉及社會運動而被檢控嘅罪名，經審訊而裁定嘅刑罰拾級而上、越來越嚴苛，但係及後嘅社會運動，無論係參與人數、時間、規模以及激烈嘅程度仍然逐步擴大。
我認為每一場暴動都係人民無被聽見嘅聲音，如果我哋香港人民嘅合理訴求持續被漠視，矛盾同衝突必然會接踵而來。高壓統治、嚴刑峻法，充其量只能收一時之效，深層次嘅矛盾，必須要尋求解決之道，社會先有可能復和、邁進、穩定繁榮，否則難言長治久安，更加遑論由治及興。
解釋參與初選原因
法官閣下，我參與「35+」初選嘅原因，既有遠因，亦有近因。先講遠因，我個人嘅信念，相信政府係人民嘅僕人，而唔係統治者。我相信無人願意被極權統治。我認為每一個人都希望生活喺一個可以追求夢想，免於恐懼嘅社會。
作為一個香港人，我有一個理想，我認為大家應該擁有，亦都值得擁有自由、平等、包容嘅社會、有效維護人權法治公義嘅民主制度。
法官閣下，2019 年係我參選嘅近因，當其時有 3 個因素促使我採取呢個決定。第一個，係我對自由被侵蝕嘅恐懼；第二，係對政府傲慢嘅不滿；第三，亦都係最重要、最令我動容嘅原因，係我對離世生命嘅沉重、悲痛，我完全唔希望有人受傷，無論佢哋嘅政治取態。我亦都唔希望有人被捕，更加難以忍受有人犧牲生命但自己無動於衷，毫不作為。
作為一個普通市民，我無能力起死回生，我甚至無辦法阻止佢哋付出自由同埋生命嘅代價，我無完美嘅答案去解決如此巨大嘅問題，但我有義務，去繼承佢哋嘅信念。基於上述嘅原因，我認為參與社會運動、地區嘅服務、投身政治，係我可以為呢個社會，有所貢獻嘅行動。
自覺有責爭取實現選民合理訴求
法官閣下。我喺 2019 年，憑藉住 4,371 位嘅選民，對我嘅信任而成為元朗區區議員。喺初選之中，憑藉住 20,525 位香港人，佢哋嘅支持而勝出初選。假若 2020 年 9 月 6 日，立法會嘅選舉能夠如期順利舉辦，當日嘅結果，可能會係我人生之中，最榮幸收到嘅生日禮物，成為一個代議士，一個香港民意嘅代表。
我期許我自己嘅首要責任，係為民發聲，為民請命。我有責任去捍衛人民嘅權利，同埋佢哋嘅自由，努力爭取選民合情合理嘅訴求得以實現，即使機會係渺茫，即使我個人對於建制上尋求改革係毫無信心，但我仍然要選擇承擔風險，尋求打破局面嘅機會。
法官閣下。正如我喺後面下一段嘅陳詞所講，喺我被捕之前，我實在無諗過會因為本案而入獄，但係並唔等如，我認為成為一個代議士係唔會犯上任何嘅《國安法》。我嘅意思，係我認為即使我唔係成為一個立法會議員，但係喺《港區國安法》之下，我繼續參與政治活動或者社會運動，有好大嘅風險會觸犯相關嘅法律。
我會將呢個問題，分開兩個方向。如果就住本案「35+」計劃，成為一個立法會議員，喺議會度無差別否決預算案，正如當時，啱啱所重複，我係無諗過因為呢件事而違法，但係另外一方面，我認為，我喺立法會議員以外嘅身分嘅行動，譬如，舉一個例（官打斷提醒自證其罪風險）。
OK，咁我繼續落去。法官閣下，距離我被捕之前，我無任何一刻打算離開香港，我願意為我嘅行為負責，但係我唔會為我同選民所共享嘅信念同埋價值而道歉，我唔可以辜負人民嘅信任。正如我所講，我為我所有嘅言行負責，我會承擔一切嘅代價。
（法官李運騰問，是否即對所做行為無悔意？）無錯。作為一個政治人物，我期許我要有承擔，竭盡我所能，留守到最後一刻，所以我並唔後悔，我選擇留喺香港，我需要兌現我莊嚴嘅承諾，同香港人齊上齊落。
仍望盡力留港貢獻 引包致金說話
法官閣下，展望將來，我作為民意代表嘅任期，已經完結（抿嘴）我打算放低政治人物嘅身分。但我仍然希望，盡力留喺香港，貢獻社會，即使我已經預視到困難係重重嘅。不過，法官閣下，下兩句就會講到，我點樣去貢獻呢個社會。不過首先，一如時任啲終審法院法官包致金先生所講「There is no reason to leave if things are good, and if things are bad, there are more reasons to stay」。
我認為香港人同我，只要抱持自救、互助嘅精神、理性嘅思考，行公義、好憐憫，存謙卑的心，紀錄過去嘅真相，活在真相嘅當下，為未來做好真誠嘅準備，香港嘅未來，將會重拾光明，而香港人嘅理想，一定會實現。
最後，法官閣下，20 世紀嘅完結，我哋向蘇聯同納粹做告別，失去足夠制衡嘅權力，必然會自我膨脹，絕對嘅權力，必然帶來絕對嘅腐敗。長夜終盡，黎明將至，民主終將再次得勝。
我感謝 3 位法官嘅包容同埋忍耐。本人謹此作結。
HCCC69/2022、HCCC70/2022
文章来源：法庭线
没有评论:
发表评论
注意：只有此博客的成员才能发布评论。